Kaomendj Vastelaovendjsezoen bestaon De Rogstaekers 9 × 11 jaor.
Ónger de titel ‘Bekans ieëwig joonk’ schriêftj de vereîniging daorum ‘ne ontwêrpwedstriêd uut vör ‘t jubileumlogo!
Neteurlik wurtj dieeze bezûndjere miêlpaol groeëts geveerdj. De invölling daovan wurtj later bekindj gemaaktj. Mer vuuërdet de activiteite van start kunne gaon, zulle vae ’n jubileumlogo gaon prizzentieëre en dét kân zoeëmèr eur ontwêrp waere!
Umdet vastelaovendj e fieëst és van ‘t vôlk wille vae de vastelaovendjveerder heej gaer in betrékke.
Edere Wieërtenaar kân ‘n ontwêrp indeêne vör ’t jubileumlogo. ‘n Vakjury zâl 1 ontwêrp uutkeêze dét same met de hoêsontwêrper van de Rogstaekers wurtj uutgewêrktj tot ‘t jubileumlogo. Daonaeve zâl dit ontwêrp waere gebroêktj as basis vör ‘n speciaal jubileumpinke.
Vuuërwaerde
D’r zeen înkel basisvuuërwaerdes opgestéldj woeë ‘t jubileumlogo aan mót voldoon, mer vör de rest hebbe de daelnemers aane ontwêrpwedstriêd de vreeje hând.
Dieës vuuërwaerdes zeen:
- Nostalgische uutstraoling
- Verhaojing ongevieër 1:1
- 9 × 11 jaor mót verwêrktj waere
- Volvlak kluuëre
- Rogstaekers naamgaeving wurtj later tówgeveugdj
- Full colour of zwért-wit moog, gein schaduweffecte
- Logo wurtj in samewêrking met de hoêsontwêrper definitief gemaaktj
- Aanlevering beej vuuërkuuër digitaal, ingescandje teîkening moog ouch (minimaal 20X20 cm)
- Hoeëg resolutie (min 300dpi) Vector (AI of EPS), JPG of PDF
Gae kuntj eur ontwêrp t/m 31-07-2024 insteure nao sikretaris-pr@vvderogstaekers.nl ónger vermélding van Ontwêrpwedstriêd.
De winnaar wurtj inne loup van augustus benaderdj en ‘t jubileumlogo zâl in aanloup nao ‘t jubileumsezoen waere geprizzentieërdj.
