Jubileumlogo en -programma onthuldj

11-10-2024

Stadsvastelaovendjvereîniging de Rogstaekers bestieët in 2025 mer leêfst 9x11 jaor en veêrtj dét met ‘n speciaal logo en ‘n uutgebrédj jubileumprogramma.
Ónger ‘t motto “9x11 jaor: Bekans ieëwig joonk” schrieëve De Rogstaekers aafgeloupe zoeëmer ‘ne ontwêrpwedstriêd uut ter ieëre van ‘t 9x11-jaorig bestaon. Verschillendje Wieërter creatievelinge steurdje heur ideeë in. Uuteindelik koeës de vakjury ‘t ontwêrp van Vastelaovendj-leêfhebber Mark Koppen.

 

Mark Koppen: “Ich woeëj vörâl de jeugd en de tówkomst benaodrökke. ‘t Dânsmarietje (Huppelpupke) symbolisieërtj dét. Oppe achtergrónd zeejjae de skyline van Wieërt met herkinbaar gebouwe. Neteurlik zeen ouch ‘t Köpke en de Gouwe Rog, di-j De Rogstaekers zoeë typieëre, óngerdael van ‘t gehieël. ‘t Gehieël dréjtj um lôl, plezeer en meziek, zjuust wi-j de Vastelaovendj. ‘t Logo keumtj voeërt uut ‘n book det ‘t nowwe hoeëfdstök van 99 jaor Vastelaovendj in Wieërt inloetj.”

Vorst Jasper Heesakkers: “De jury woor unaniem in heur kuuëze. Dit ontwêrp bevatj alles woeë vae as vereîniging vör staon en woeë Wieërtenare gruuëts op kunne zeen.”

‘t Logo és ‘t kaomende jaor oeëverâl te zeen en wurtj ouch as medalie uutgebrachtj.
Vanaaf 16 november és dieës te koup via oeës webshop .

Jubileumprogramma

Naeve ‘t logo prizzentieëre De Rogstaekers ’n fieëstelik programma ter ieëre van dieëze bezûndjere miêlpaol.

Sezoensoeëpening (16 november)
Op zaoterdig 16 november wurtj ‘t jubileumsezoen fieëstelik gestartj inne binnenstad. Same met zöstervereîniginge staeke De Rogstaekers ‘t Vastelaovendjveur aan. Daonao trékke de vereîniginge langs verschillendje kefees, woeë artieste zulle optraeje. Edereîn és van hérte welkom vör ‘ne middig en aovendj vôl gezélligheid.
Boonte Aovendje en Boonte Femiêlie Middige (29 jannewarie – 2 fibberwarie)
‘n Now concept! Eîn weekend vôl Boonte Aovendje en twieë Boonte Femiêlie Middige. De Boonte Aovendj kriegtj ‘ne frisse opzét met now elemênte wi-j ‘ne dânsgroep, live meziek en ‘n koeër. De lôl en flawwekûl bliêve neteurlik, dét verângertj neet! Op zaoterdigmiddag wurtj de Jeugdpreens uutgeroope, gevolgdj doeër de onthulling van de Groeëte Stadspreens tiêdes de Gala Boonte Aovendj.
Jubileumfieëstweekend (21-23 fibberwarie)
‘t Fieëstweekend vingtj plaats van 21 t/m 23 fibberwarie.
Op vriêdigaovendj és d’r ‘n fieëstelike ‘sitzung’ in ‘t Franciscushoês, ter ieëre van Wieërt as Europese Cultuur- en Vastelaovendjstad. Verwachtj dao optraejes van o.a. Beppie Kraft, Marjolein Heijntjes en Wieërter Vastelaovendjartieste.
Zaoterdigmiddig stieët in ‘t teîke vanne jeugd, gevólgdj doeër ‘n knalfieëst op zaoterdigaovendj met o.a. Big Benny en Moerepetazie.
Zoondigmêrge ésj tiêd vör Frühschoppen, en zoondigmiddig vör ‘ne gezellige matinee vör de ‘iets aojer jeugd’.

Naeve dieës jubileumactiviteite vînge ouch de jaorlikse evenemênte plaats, wi-j de Groeëte Rogstaekersoptocht, de Wichteroptocht, ‘t Boorebâl, de Sluuëteloeëverdracht en de Vastelaovendj-més.
Mieër details en de complieëte agenda vingdjae neteurlik op dieës website en in de ‘Vastelaovendj inne stad’-app.

Mark Koppen en Vorst Jasper gaeve in dieëze video tekst en uutlegk oeëver 't 9x11 Jubileumlogo