Twieëdje editie “Vastelaovendj inne Stad”

24-01-2025

Stichting Behoud van Beleving, Stadscafé de SooS en Stadsvastelaovendjvereîniging De Rogstaekers organisieëre dit jaor vör de twieëdje kieër Vastelaovendj inne Stad.
Van vriêdig 28 fibberwarie wis dieënsdig 4 mieërt zeen de Mêrrentj en de Nowwe Mêrrentj hét hért vanne vastelaovendj in Wieërt.

Viêf daag Vastelaovendj inne Stad
Op allebej de pleine inne binnestad van Wieert kaome twieë groeëte podia te staon, woeë-op tal van bekindje artieste eîn groeët fieëst zulle bawwe. Mét de noeëdige barretjes, aetkräömkes en sanitaire vurzeeninge kujje uch good ammesieëre tiêdes Vastelaovendj inne Stad.

Dit jaor kujje zoeëwaal op allebej de pleine as ouch beej De Soos betale mét dezelfdje mûnte. En wildje mét di-j daag neet te lang in de ri-j staon um di-j mûnte aan te schaffe, dan kujje di-j noow alvast online én mét korting bestelle!
Det kân via de website www.vastelaovendjinnestad.nl of via de app. Besteldje mûnte kujje op vertoeën van de verkrieëge QR-code ophale beej De Soos. Det kân op donderdig 27 fibberwarie tösse 17 en 19 oor of op vriêdig 28 fibberwarie van 12 tot 17 oor.

 

Programma
De organisatie és van plan um op vriêdig 28 fibberwarie van 12:30 tot 18:00 oor oppe Nowwe Mêrrentj  'ne gezellige middig te haoje vör de jeugd in Wieërt. Daonao begintj um 19:00 oor oppe Mêrrentj 't Aod Preense Treffe mét op 't podium ónger ângere Harry & Joerik, Moerepetazie en Mark Gruithuijsen.

Zaoterdig 1 Mieërt startj Vastelaovendj inne Stad medeîn nao de Vastelaovendjmés van 15:30 oor mét 't Preensebâl oppe Mêrrentj, woeebeej de meziek és van o.a. Ed & Frans,  Plat Wieërs, Stefan Wolter en de Um te Bäöke Bènt. Oppe Nowwe Mêrrentj kujje gaon kieke en luuëstere nao Noa Veltrop, Shakin DJ's, La Bamba, Harry & Joerik, Deindânger en Sjpringlaevend.

Op zoondig 2 mieërt kujje oppe Mêrrentj de priêsuutreiking van de Rogstaekersoptocht mejmake. Vör de muzikale ontspanning vuuër, tiêdes en nao de priêsuutreiking staon Mark & Wilhelmien, de Köpkes en Kartoesj garânt. Oppe Nowwe Mêrrentj gieet Wieërt A-laaif al um 15:00 oor van start mét optraejes van ónger mieër Danny Pouwels, Marleen Rutten, Moerepetazie, de Broeëds Brothers, Thorsten von Lippe Biesterfeld, Big Benny en 2 Òngerein.

Maondjig 3 mieërt lutj de jeugd eur creaties zeen tiiêdes de altiêd gezellige Wichteroptocht, dae um 14 oor begintj. Nao aafloup waere de priêze uutgereiktj beej de Hosmiddig oppe Mêrrentj, woeë Patrick Hendrikx zâl optraeje en de hèndjes lutj wappere. Daonao és 't de buurt aane Wieërter 11 mét eure meziekkaravaan doeër de Wieërter binnestad. Dit kieër ónger 't motto:"Deep inne zieë!"

De Hermeniekes on Tour zeen op dieënsdig 4 mieërt de opmaot nao 't Rogstaekers Oeëpe Podium oppe Mêrrentj. Mark Gruijtuijsen en de Rogstaekers prissentieere dit spektakel met kepelle, buutereedners, dânsgroepe, muzikânte en edereîn dae mer mej wiltj doon. Um 't programma e bitje te kunne indaele mojje uch waal van te vuuëre opgaeve via 'n mailtje aan info@vvderogstaekers.nl

Neteurlik zeeje ouch van herte welkom beej de abdicatie van oees Preense, di-j um 19:30 oor begintj.

 
't Volledige program kujje ouch bekieke inne app "Vastelaovendj inne Stad". Hejje dieëze app nog neet,dan kujje dae zoeëwaal vör Apple as Android downloade via
https://onelink.to/rogstaekers