De 11-jaorige Lex Willekens gieët dit jaor de Wieërter Wichtervastelaovendj vuuër as 73e Jeugdpreens van De Rogstaekers.
Aan ‘t indj van de knotsgekke Boonte Femiêlie Middig woeërt de 9 × 11-Jubileum Jeugdpreens bekindj gemaaktj. Vôl enthousiasme stéldje Jeugdpreens Lex I zich vuuër aan ‘t massaal aanwieëzige publiek in ‘t Munttheater.
Naodet de nowwe Jeugdpreens woeërt geboeëre in ‘t Sint-Jans Gasthoês noeëme pap en mam ‘m mej achter de tunnels, nao de Kruuësstraot, woeë ‘t hoêshaoje nog stieëds woeëntj.
Pap és Rolf Willekens, van Peter van Joeëste Tien uut d’Indj en mam, Marion Smeets, és ‘n dochter van Loek van Cis de Kapper.
Zjuust wi-j z’n zöster Suze en zösterke Lot és Jeugdpreens Lex I ‘ne échte vastelaovendjveerder. In 2023 woor hae Jeugdboor beej de Vêrkusköp en Suze zoog vuuërig jaor heure droûm uutkaome wi-j ze Jeugdpreenses van de Vêrkusköp mócht waere. Same spuuële broor en zösse met völ plezeer inne Wichterboontemiddig van Wieërt-Zuid.
Als orde hieët Jeugdpreens Lex I ingestéldj de
‘Orde van ’t braaf mènke’
Doeërdewaek és Lex namelik met stip ‘t ‘braafste mènke’ van Brej Schoeël Moesel, woeë hae met völ plezeer in groep 8 beej juf Nasira en juf Marlies zitj. As de bel és gegânge paktj Lex zien roeëd fietske en gieët dan same met z’n kammeräöj de buurt in um te voetballe, klumme, klautere en ânger dînger te doon di-j pap en mam neet per se hoove te wiête. ‘t Kósj ‘m dan ouch dék moôte um vuuër ‘t aete thoês te kaome.
Stil zitte és niks vör oeëze Jeugdpreens en dao zeen ze beej de D1 van H.V. Rapiditas mer wát bli-j met. Handbal és vör Jeugdpreens Lex I de schoeënste sport di-j d’r és.
Same met zien adjudânte Guus Raemaekers, Gijs Peeters en Aivi van Gansewinkel, Jeugdvorst Jesse, de Jeugdraod van Ellef en de Huppelpupkes gieët Jeugdpreens Lex I de Wieërter wichtervastelaovendj vuuër ónger zien devies:
Wichter neet te braaf,
Kaaktj met mich mej: Wieërt ALAAF, Wieërt ALAAF,
Wieërt ALAAF!
Vanaaf ‘t momênt det Lex gevraogdj és um Jeugdpreens te waere, wurtj hae gevólgdj doeër ‘n cameraploog van KRO-NCRV. Ouch de kaomendje waeke zulle d’r opnames gemaaktj waere vör ‘n documentaire di-j te ziêner tiêd op NPO 3 te zeen zâl zeen.
(Foto’s: FLITZER! fotografeert | Loes Mennen)
Jeugdpreens Lex I beej ziene maidenspeech (foto: Johan Horst)
