De nowwe opzet beej de vuuërstellinge van de Boonte Aovendje en de Boonte Femiliêmiddige és ’n groeët succes geblieëke.
Det koeëm neet alleîn nao vuuëre in de groeëter cohesie en samewêrking tösse de artieste van dieës twieë geledinge, mer ouch tösse de artieste en de daelnemers uut de ânger groeperinge.
In ’t verlieëje koszje kieke nao sketches en nao muzikale optraejes, woeëbeej incidenteel ouch de ânger disciplines woeërte ingezatte.
Mer noow bliêk ‘t ’n geïntegrieërdj gehieël van acteurs, muzikânte, zêngers en dânseressen.
Want dit jaor waas neet alleîn de (uutgebrèdje) BOVAG vanne perti-j. Nein, ouch de zîngendje manne van Manoeuvre o.l.v. Noël Seerden en de groeëte groep dames van One in Motion vormdje ’n wezenlik óngerdael van ’n vuuërstelling, di-j klônk wi-j ’n klok en zich manifestieërdje as ’n spektakel mét völ kluuër en vaart.
‘t Commentaar van ’t pebliek oppe sociale media és lovendj. Zoeëmèr wat reacties:
- “Genoeëte, waat ’n show”
- “Vae hebbe ‘ne top-aovendj gehadj”
- “Chapeau vör edereîn”
- “Kân ich mich opgaeve vör dânsgroep Bertha”
Barrie Stevens zoeëj in gebroeëke Wieërts zégke: “Vörâl zoeë doeërgaon!”