Ondanks zien drökke daagprogram vóng Preens Stefan II op zaoterdig 15 fibberwarie nog tiêd um înkel bezeuke te brînge aan groepe, di-j volop bieëzig zeen mét 't bawwe van 'ne wage.
Op uutnuuëdiging van 't FoS, de kemissie vanne Rogstaekers, di-j de organisatie van de optochte in behieër hieët, waas hae aanwieëzig op e paar Wieërter locaties, woeë d'r nog volop waerdje geplektj, geschaafdj, getummerdj, gelasj, gevêrfdj en al det ânger wêrk, waat d'r keumtj kieke beej 't bawwe van 'ne wage.
Ziene Hoogheid kieëk zien auge uut en aaf en tów waas hae mét stomheid geslage beej zoeëvöl schoeëns inne maak.
De krètjes beer, di-j hae op eder bawplaats achterlieët, woeërte mét enthousiasme ontvânge.
Op zoondig 2 mieërt zal hae kunnen geneête van 't îndjproduct, det al dieës vastelaovendjveerders in hert en nere hebbe gemaaktj.
