Aan alles keumtj 'n îndj, ouch aan 'n 9x11 Jubileumsezoen. Mer waat kujje uch dan nog mieër wînse, dan det 't wurtj aafgesloeëte mét twieë Preense, di-j doeër edereîn op hang woeërte gedrage.
En det hebbe ze mét (9x11 + 1) % verdeendj, want dieës kanjers hebbe in de periode det ze mét hoeëgheid waerdje aangesproeëke, laote zeen, det 't gewoeën twieë Wieërter joonges zeen, di-j zjuust wi-j edereîn kaome uut 'n Stad van Edereîn.
Tot vuuër e paar waeke waas Lex gewooeën det braaf mènke van Willekens uut de Kruuësstraot en Stefan dae lieëraar, di-j métte Vastelovendj niks leêver deut, dan minse plezeêre mét zien lidjes. En dan koame dao op 1 fibberwarie 2025 Jeugdpreens Lex I en Stadspreens Stefan II wi-j 'n duûvelke uut 'n duuëske. Net veer waeke later kriêge ze de sluuëtels van de stadsporte uutgereiktj, mer in de tössetiêd hebbe ze al laote zeen, det ze neet boeëve de minse zulle staon, mer vastelaovendj zulle veêre mét de minse. Vör edereîn aandacht, vör edereîn 'n "Gezellig, dejje d'r weer beej zeetj".
Hoeëgtepûnt vör dieës twieë 'manne' és neteurlik eure eige optocht en gehôlpe doeër 'n straolendje vuuërjaorszon kóste dao doêzendje minse langs de kânt van mejgeneête.
En vuuër det ze d'r êrrig in hebbe, és 't dieënsdigge aovendj: 't Roggebieëst wurtj aangestoeëke en dan és 't memênt dao, det eur de vaere, de sluuëtels en de preensemedalies waere aafgenoeëme en ze weer doeër 't laeve gaon as Lex en Stefan. Sommige minse staon stiêvig te bäöke, ânger pînke e träönke wégk. Stefan bedânktj mét 'n deêpe buiging zien pebliek, mer dezelfde geste zoeëj ângersum zieëker ouch op zien plaats zeen.
't És vörbeej, 't és gedaon, dit waas zoeë schoeën, baeter gaon ve 't neet kriêge in dieës Stad van Edereîn: Wieërt Alaaf!
tekst: Jan Lormans
foto's: Johan Horst
♦ 'n Braaf Mènke
♦ Respect!
♦ Aan alles keumtj 'n îndj...
