Al tieëntalle jaore tréktj de Groeëte Rogstaekersoptocht doeër de straote van Wieërt, ‘ne boonte stoet van kluuër, meziek, creativiteit en plezeer. Waat oeëts és begósj as ’n lokaal traditie és uutgegruuëdj tot eîn van de mieëst uutbundige vastelaovendjgebuuërtenisse inne regio. Eder jaor make de deîlnemers same iets unieks. En dit jaor… kujjae dao ouch beej zeen!
Woeërum mejdoon?
De optocht és völ mieër as mejloupe mét ’ne prachtige wage of verklédj de straot op gaon: ’t és ’n belaevenis. Same mét vrînde, femiêlie, de buren of eur collega’s bawdje aan iets bezûndjers en det van ’t ieërste idee tot aan det gruuëtse memênt, dejje langs ’t pebliek tréktj. ’t Geveul, dejje dao same waertj towgejuichtj doër tieëndoêzendje kiekers langs de kânt, det vergaedje noeëts mieër.
En wejje, waat ’t schoeënste és? Edereîn kân mejdoon. En det kân as groep mét ‘ne groeëte of kleîne wage, mer det hoof hieëlemaol neet!
Messchien wildje mét e paar vrînde ’n lollige act opveûre, mét eur vereîniging mejloupe, of hieëlemaol alleîn wat creatiefs laote zeen: alles és welkom. Ouch meziekkepélle zeen ’n onmisbaar óngerdeîl vanne optocht: ze zörge vör sfeer, tamtam en laeve inne brawweri-j!
De Groeëte Rogstaekersoptocht drèjtj um plezeer, originieël zeen en ’t same veêre van Vastelaovendj, of dejje noow ‘ne bawwer zeetj, ‘ne muzikânt of gewoeën emus mét e good idee en völ zin in gezelligheid.
’n Traditie um gruuëts op te zeen
Vanaaf de jaore viêftig és de Groeëte Optocht van Wieërt hét Hoeëgtepûnt vanne Vastelaovendj. Generaties Wieërtenare hebbe mejgedaon: van jong wichter wis geroutinieërdje bawwers en meziekkepélle. Weem mejdeut huuërtj d’rbeej. En zjuust det geveul van verbôngeheid maaktj de optocht zoeë bezûndjer.
Schrieftj uch noow in!
Twiêfeldje nog? Bedînk dan, det nemus, dae oeëts hieët mejgedaon, d’r spieët van hieët gehadj. De lach, de meziek, de gezelligheid, ’t applaus: ’t és zuuëvere Vastelaovendj-magie. ✨
👉 Schrieftj uch heej in vör de Groeëte Rogstaekersoptocht van Wieërt! 👈
🔹 Deîlname & inschriêving
És deîlname gratis?
Jao, mejdoon és 100% vör niks, d’r és gein inschriefgêldj. Stêrker nog: gae kuntj zelfs gêldj verdeêne, aszje inne priêze valtj! Mét e bitje creativiteit en gelök verdeêndje dus neet alleîn ieëwige roem, mer ouch ’n schoeën bedraâg uut de priêzepot. 💰
Wi-j mójje uch eigelik inschriêve?
Naw, det és hieël gemekkelik. Gae kliktj op dieëze inschrieflînk en völtj dao de gevraogdje gegaeves in. Laotj dao ouch eur bânkraekeningnummer achter, zoeëdet de organisatie ’t muuëgelike priêzegêldj aan uch kân oeëvermake.
Wis wannieër kujje inschriêve?
- Wages (kleîn of groeët) wis woonsdig 7 jannewarie 2026
- Oeëverige deîlnemers wis woonsdig 21 jannewarie 2026
Mójje lid zeen van ’n vereîniging
Nein, det hoof hieëlemaol neet! Edere groep, kwartet, trio, koppel of eînling kan zich inschriêve. Edereîn moog mejdoon aanne Groeëte Rogstaekersoptocht.
Mójje per se uut Wieërt kaome?
Mer nein, edereîn és welkom, of dejje noow uut Wieërt komtj of neet. Minse uut umliggende dörpe en stieëje doon al jaore enthousiast mej en brînge dék eur eige kluuër en sfeer mej inne stoet. Zjuust dae mix van deîlnemers maaktj de optocht zoeë bezûndjer. En trawwes: deîlnemers van boete Wieërt hebbe regelmaotig groeëte priêze gewonne in de Rogstaekersoptocht! 🎭
🔹 De daâg vanne optocht
Wi-j laat begintj de optocht?
Alle deîlnemers verzamele zich vanaaf ’n oor of 11 aanne Parallelwieëg, mer de start és um 13:00 oor.
Wi-j luiptj de route
Vanaf de start aan de Parallelwieëg tréktj de stoet oeëver de Driesveldlaan, de Wilhelminasingel, de Kestieëlsingel en de Emmasingel, woeë de ontbînging ’s beej de Walburg.
Wi-j lang deurtj de optocht?
Gemiddeldj tréktj de stoet zoeë ’n twieë oor. Edereîn luiptj röstig, zoeëdet de minse langs de kânt good kunne geneête van al det schoeëns.
Waat gebuuërtj d’r allemaol oppe daâg zelf?
Zoeë wi-j gezagdj verzamele de deîlnemers zich aanne Parallelwieëg volges de volgorde, di-j van te vuuëre doeër de organisatie és bekindj gemaaktj. En wi-j mieër ’t op 13:00 oor aangieët, wi-j mieër de spanning és te veule. En dan ésj zoeë wiêt, dan tréktj de optocht fieëstelik doeër ’t centrum van Wieërt, mét völ meziek en applaus langs de kânt.
En nao de optocht? Dan begintj ’t fieëst pas echt! ’t És eîn en âl gezelligheid en deîlnemers en bezeukers trékke same nao de pleine en de kefees um nao te kalle oeëver dae optocht, te lache en te geneête van de sfeer, zjuust wi-j Vastelaovendj bedoeldj és. 🎉
Op zoondigenaovendj és dan de priêsuutreiking oppe Mêrrentj beej de groeëte St. Martinuskêrk. ’n Fieëstelik memênt, woeë edereîn, deîlnemers en vastelaovendjveerders, samekeumtj um de winnaars te fillisitieëre! 🏆
🔹 Vuuërberei-jing en creatie
Hejje per se ’n wage noeëdig um mej te doon?
Nein huuër! ’n Wage és hieëlemaol neet verplichtj Of dejje noow beej een groeëte of klein groep zeetj, beej é kwartet, ’n trio of koppel, of zelfs as eînling: edereîn kân mejdoon. ’t Drejtj allemaol um de gezelligheid, de creativiteit en ’t same plezeer make.
Moog ich ouch mét ’n klein groep mejloupe?
Mer neteurlik. Wi-j groeët eur groep és, maakdje zelf uut. Mer de gruuëdje bepaaltj waal de categori-j, woeë dejje beej ingedeîldj waertj, zoeëdet edereîn ‘ne ieërlike kâns maaktj oppe priêze.
És d’r ’n centraal thema of moge vae zelf wat bedînke?
Eur óngerwêrp bepaoldje hieëlemaol zelf. Det kân op basis van ’n lollige uutspraak, iets uut de politiek of wat op det memênt actueel és, of gewoeën wat geks, waat dejje zelf verzintj. Alles moog, zoeëlang ’t mer leuk blieftj en vör nemus kwetsendj és.
Wi-jvöl tiêd kósj det um iets te make?
Det ligktj hieëlemaol aan eur creatie. Sommige deîlnemers zeen maondje van te vuuëre bieëzig, ânger regele ’t in e paar aovendje. Mer eîn dînk és zieëker: d’r aandacht aan besteeje maaktj alles schoeëner en loeëntj zich. Zeetj ’t vörâl as ’n kâns um lekker creatief bieëzig te zeen!
És d’r ouch begelei-jing?
Jao, ouch tiêdes de stoet és de Optochtkemissie FOS aanwieëzig en ouch inne aanluip nao de optocht tow kujje dao altiêd beej terecht vör vraoge, tips of uutlégk.
🔹 Praktische zake, sfeer
Zeen d’r ouch vörzeêninge beej de opstelplaats?
Nein, aanne Parallelwieëg zeen geen faciliteite wi-j wc’s of ’n bar. Waal és d’r dék meziek en de mieëste minse neme eur eige drênkskes mej. Dînktj d’r waal aan, det drônkelappe neet mej moge doon aanne optocht. Ouch moog d’r ónger de optocht geîne alcohol waere gedrônke. Inne buurt zeen kefees, woeë dejje effe nao ’t toilet kintj.
Moogdje tiêdes de optocht meziek make?
Jao, gaer zelfs. 🎶 Zörgtj wul vör e zjuust volume. Neet te zaocht, want dan kunne de minse niks huuëre, mer ouch neet te haard, want dan blaozje edereîn oeëverhoup.
Waat gebuuërtj d’r beej slecht waer?
Hieël dék schientj de zon, mer mocht ‘t ‘ne kieër raengele, dan gieët de optocht toch doeër. Dootj uch dan beejvuuërbieëldj ‘ne doeërzichtige raengelcape aan, zoeëdet ’t pebliek eur pekske toch good kân zeen. En ouch beej e bitje snieë gieët de optocht gewoeën doeër. Mer mocht ’t waer te gek waere, wi-j storm of zwaere snieëvâl, dan zal de Optochtkemissie oppe tiêd communicieëre mét de deîlnemers, waat d’r dan gieët gebuuëre.
🔹 Oeëverige vraoge
Zeen d’r vuuërbieëldje van groepe di-j gewoeën vör de lôl mejloupe?
Zieëker. Eder Jaor doon d’r groepe mej, di-j vörâl deîlneme vör de gezelligheid. Det kunne vrîndegroepe zeen mét ’n ludiek óngerwêrp, mer ouch femiêlies, di-j spontaan wat lolligs bedînke. Want ’t drejtj allemaol um de sfeer en ’t same geneête.
Wi-j hoeëg és ’t priêzegêldj?
De Rogstaekers organisieëre allerli-j activiteite, woeëmej gêldj wurtj verzameldj vör de priêzepot, Ouch de jeurgd van 12 wis 18 jaor, di-j zich beej-eîn hieët gepaktj ónger de naam Roggebieëste, hultj tiêdes de optocht ’n vreejwillige (mer wul aanbevoeële) Euroactie ónger de tówschawwers, woeëmej ‘t priêzegêldj wurtj opgehuuëgdj. De Wieërter optocht stieët bekindj um zien rejaal prieêze!
Mójje dialect kinne kalle?
Nein huuër, mer ’t és wul lollig (én hendjig) um eur motto in ’t dialect op ’n bord te zétte, zoeëdet edereîn ’t kân laeze. Kujje det zelf neet schriêve? Gein prebleem: de Optochtkemissie hêlptj uch gaer mét de zjuuste vertaling of spelling.
Toch nog iets onduuëdelik?
Beej eur inschriêving kujje nog opmêrkinge en vraoge kwiêt, woeë de Optochtkemissie altiêd op reagieërtj.
VÖL PLEZEER MÉT DE VUUËRBEREI-JING EN MÉT DE OPTOCHT!
