In 2027 és Wieërt ‘t decor van de 51e finale van ’t Limburgs Vastelaovesleedjes Konkoer (LVK). De organisatie van dit provinciale evenemênt és in hang van Stadsvastelaovendjvereîniging De Rogstaekers en Stichting Bospop, twieë vertrawdje Wieërter name, di-j hun krachte bundele um e groeëts, sfeervôl en good georganisieërdj fieëst nieër te zétte.
De finale vingtj op vriêdig 29 jannewarie 2027 plaats in ’n speciaal te bawwe fieëstpaviljoen in Wieërt, mét plaats vör zoeë ‘n 7.500 bezeukers.Mét dieës towwiêzing doeër de Stichting LVK kriegtj Wieërt oppernoets e prominênte rol binne de Limburgse vastelaovendjtraditie.
’t Vreugtiêdig bekindj make van de locatie és e bewuste kuuës, zoeë zieët LVK-vuuërzitter Roel Florie: “E groeët provinciaal evenemênt organisieëre vör zoeë ‘n 7.500 leefhebbers vêrgtj völ inzet. De ervaring lieërtj det ’ne lange vuuërbereidingstiêd beejdraagtj aan ’t succes van ’t evenemênt."
De samewêrking tösse De Rogstaekers en Stichting Bospop vormtj e stêrke combinatie van traditie en organisatorische daadkracht.
De Rogstaekers brînge ruuëm ‘ne ieëw vastelaovendj-ervaring en lokale betrókkeheid mej, óngerhând det Stichting Bospop eur expertise inzétj op ’t gebied van logistiek, veiligheid en terreînorganisatie. Same wille de parti-jje ’n LVK organisieëre, det Limburgs van hért és, mer oeëverduuëdelik Wieërts in sfeer en uutveuring.
Ouch de gemeîndje Wieërt óngerstuuëntj ’t initiatief vôl oeëvertuuëging. Wethaojer Martijn van den Heuvel, mét ónger ângere Evenemênte in zien portefeuille: “Vae zeen gruuëts um in 2027 ’t LVK in oeës stad welkom te heîte. De meziek, de gezelligheid en ’t échte vastelaovendjgeveul verbînge minse uut de hieël provincie in oeës schoeën stad. Vae gaon d’r same ’n onvergaetelik evenemênt van make!”
In 2026 vingtj ieërst nog ’t gouwe, 50e LVK plaats in Landgraaf, georganisieërdj doeër de Stichting Carnavalsevenementen Landgraaf op ’t Megalandterreîn. Daonao verhoêsj ’t fieëst nao Wieërt, woeë in 2027 de 51e finale wurtj geveêrdj mét de bekindje Limburgse passie, mer op ’n gehieël eige Wieërter meneer.
