Op 22 november hieët edereîn kunne geneête van 't concert, det Harmonie St. Joseph 1880 in samewêrking mét VV de Rogstaekers hieët verzörgdj in 't Munttheater. Joonk en aod krieëg heej 'n gevarieërdje selectie uut de groeëte historie van Wieërter vastelaovendlidjes vuuërgeschoeëteldj. Speciaal vör dit concert hieët Frits Kessels Jr. van alle nummers de prachtige arrangemênte geschrieëve. 't Zoeëj zundj zeen, as dao neet mieër minse gebroêk van kunne make. Te dînke veltj aan al di-j kepèlle, di-j Wieërt riêk és, mer ouch beej ânger gelaegenhede kunne dieës lidjes messchien opnow waere gespuuëldj. Van al dieës lidjes stieët per instrumênt de blaadmeziek in 't archief op dieës website en ouch de midibestânde zeen dao beej te beluuëstere.
