Jeugdpreens Casper I gieët stuiterendj de vastelaovendj doeër
De 11-jaorige Casper Winters gieët dit jaor de Wieërter Wichtervastelaovendj vuuër as 74e Jeugdpreens van Wieërt.
Aan ‘t indj van de knotsgekke Boonte Femiêlie Middig woeërt de Jeugdpreens bekindj gemaaktj. Vôl enthousiasme stéldje Jeugdpreens Casper I zich vuuër aan ‘t massaal aanwieëzige publiek in ‘t Munttheater.
Same met zien zus Kayla woeëntj Casper de helft vanne tiêd beej zien vader Rogier Winters oppe Pelmersheidewieëg in Zwértbrook. De rest vanne tiêd woeëntj ’t twieëtal beej moôder Naomi Knoppers en heure partner Niek Houben aane Zoûmwieëg in Altwieërthej.
Doeërdewaeks stuitertj Casper I doeër de Montessorischoeël en zitj, of baeter gezagdj wiebeltj, inne klas beej meîster Hans en juf Rina. Zien favoriete vakke zeen gym, boete spuuële, lunchpauze en nao hoês gaon. Nao schoeël kân de kleine Hoeëgheid zien energie kwiêt beej ‘t free runnen beej meîster Koen en drumme beej meîster Vince. As dét nog neet genóg és gewaesj, és hae dék boete te vînge of keumtj hae tot röst achter de spuuëlcomputer.
Met zoeë’n hoeëg energielevel kân ‘t neet ângers dan dét Jeugdpreens Casper I de “Orde vanne Stuiterbâl” hieët ingestéldj.
Vuuërig jaor hieët Casper al ‘s moge roêke aan ‘t Jeugdpreensschap, wi-j hae as lid van de Jeugdraod van Elf meînig fieëstje hieët geveêrdj.
Dit jaor és ziene állergroeëtste droûm uutgekaome en moog hae same met zien Adjudânte Meja Barten, Jesse Krone en Faber Gerards, Jeugdvorstin Lot, de Jeugdraod van Elf en de Huppelpupkes de Wieërter wichtervastelaovendj vuuërgaon ónger zien devies:
SAME KAAKE VAE IN KOEËR,
VAE GAON STUITERENDJ DE VASTELAOVENDJ DOEËR!
Foto's: Naomi Knoppers | Studio Blitz
