Zaoterdig 10 jannewarie 2026 vóng de installatie plaats vanne Jeugdraod van 11 en van de Huppelpupkes.
Umdet d'r vuuërig jaor e groeëte groep nówwelinge és begonne, waas d'r dits kieër mer 'ne kleîne aanwas. Beej de dânsgroep lagte drej maegtjes de eed aaf oppe Wieërter Rog en beej de Raod waas plaats vör twieë now gezichte.
Eîn van di-j twieë és van de ieërste Jeugdvorstin, di-j de Rogstaekers in eur 100-jaorig bestaon kunne welkom heîte. En di-j ieër és vör de 10-jaorige Lot Willekens. Noow huuër ich al völ minse dînke: "Willekens, woeë kin ich dae naam toch van, dae keumtj mich bekindj vuuër?" En det kân kloppe, want Lex és 't breurke van Lot en dae waas vuuërig jaor de 73e Jeugdpreens beej de Rogstaekers.
En geleuf mer, de nowwe Vorstin és ouch neet op eur möndje gevalle, dus det zitj de kaomendje twieë jaor waal snor. Det zulle de Wieërter wichter zaoterdig 17 jannewarie vanzelf mêrke, want dan wurtj de 74e Jeugdpreens doeër Lot geïnstallieërdj tiêdes de Boonte Femiêliemidig.
