Zaoterdig 31 jannewarie 2026, twieë waeke vuuërdet de Rogstaekersoptocht doeër Wieërt tréktj, waasj weer zoeë wiêt: ZDH Preens Henk III ging same mét 'n gedeîldje vanne optochtkemissie van de Rogstaekers Wages Kieke. As dejje uch aafvraogtj waat det inhultj, heej effe 'n korte uutlégk. Di-j delegatie van de optochtkemissie brîngtj in de waeke vuuëraafgaondj aanne optocht mieërdere kieëre 'n bezeûk aan de bawwers van de wages, di-j mejtrékke inne optocht. En det doon ze neet alleîn um di-j minse succes te wînse, mer ouch um te kieke of detgieëne, waat d'r in al di-j loeëdse en bawruûmdjes gebuuërtj, wul veilig és. Neet alleîn vör 't pebliek naeve de kânt, mer uch vör de bawwers zelf.
En tegeliêkertiêd kriegtj de kemissie 'n indrök vanne de materiaole en ânger attribute, di-j beej 't make van zoeë 'ne wage waere gebroêktj. Beej de Wieërter optocht ontvânge de daelnemers namelik neet alleîn priêzegêldj, mer ouch 'n vergeui-jing, di-j ónger ângere aafhankelik és van de gebroêkdje materiaole.
Wieter waere - mogtj det noeëdig zeen - de noeëdige advieze gegaeve aan de deîlnemers: "Kujje det neet baeter zoeë doon, zörgdje det de bèndj genog profiel hebbe en de gooj spanning hebbe," um mer een paar dînger te neume. En zoeë 'n twiee waeke vuuër de optocht zeeje good de verschillendje menere van aanpak beej de diverse wagebawwers. Beej de eine zeeje al volop kluuër, mer op 'n ânger zeej de minse nog mét de lieëmpot bieëzig. Det vieël ouch Preens Henk op, dae mét hieël wat minse in gesprek ging en eur 't heume van 't liêf aafvroeëg. Mer ge zultj 't zeen: op 15 fibberwarie és edereîn d'r weer klaor vör um de minse naeve de kânt, mer ouch zichzelf 'ne schoeëne en gezellige middig te bezörge. Vör de lôl enne flawwekûl, wand dao gieët 't allemaol um!
