Nao de ieërder onthulling vanne oeëpeningsact maaktj de organisatie vanne 51ste LVK-finale in Wieërt vandaag ‘t complieëte programma vör de pauze en de afterparty bekindj. Naodét Harry en de Gebroeëke Zwiêgelkes ‘t publiek vanaaf 17:00 oor hebbe opgewêrmdj en alle finaliste oppe bühne hebbe gestânge, gieët ‘t programma in ‘t fieëstpaviljoen drek wieter.
Erwin en Nachtvlinders inne pauze
Tiêdes ‘t spannendje momênt as de stumme waere getéldj, neeme Erwin en Nachtvlinders ‘t stekske oeëver. Zeuj staon in ‘t pauzeprogramma en zörge d’rvör dét de bezeukers inne tênt good wêrm bliêve in aafwachting vanne groeëte ontknuîping.
Afterparty met Träcksäck en groeëte gastoptraejes
Nao de bekindjmaking vanne winnaar neemtj Träcksäck ‘t roer oeëver, met gastoptraejes van nemes minder as Beppie Kraft, John Tana en Bjorn & Mieke! Stök vör stök artieste di-j eur spoeëre ruumschoeëts hebbe verdeendj en weite wi-j dejje ‘n fieëstje bawtj. Alle ingrediënte vör ‘n onvörgaetelike fieëstaovendj zeen aanwieëzig!
Kaartverkoup
‘t Fieëstpaviljoen aanne Statterbrök in Wieërt oeëpentj oppe daag vanne finale al um 17:00 oor zien duuëre. Wildjae dieëze unieke aovendj vôl topartieste én de striêd um ‘t béste vastelaovendjlidje van ‘t jaor van dóchtbeej mejmake? De kaartverkoup vör de 51ste LVK-finale in Wieërt startj op zaoterdig 9 jannewarie um 13:00 oor via www.stichtinglvk.nl.