2 FIBBERWARIE
19:30
Wieërter binnestad
't Boorebâl begintj oeëver:
- %D
- %H
- %M
Mieer foto's van 2025 vingdje inne:
Klômpe, klédje of ‘ne keel – laotj uch as boor es bekiêke!
’t Blieftj e spektakel: twieë schoeën Wieërter tortelduufkes di-j mekaar vînge innen onecht.
Zoeë wi-j ze in medialând oeëts zégke: de boor vingtj vraw.
Aafgeloupe jaor vónge Noortje Stroek en David Winkelmolen mekaar, mer noowdét dit huwelik vörbeej és moge vae dit jaor wéér geneête vanne pracht en praal van ’t Boorebâl!
Dieës traditie blieftj en waal dit jaor op 2 fibberwarie oppe Mêrrentj beej ’t aod stadhoês tieëgenoeëver de kêrk. Gae zeetj ammaol genuuëdj um getuûge te zeen van ’t mieëst bekindje (onechte) huwelik van ’t jaor.
Tréftj mekaar van te vuuëre inne binnenstad, woeë dejje beej de Wieërter tapperi-je kuntj geneête van écht booreaete, ónger ’t genot van e fein glaeske gerstenaat (ajje wiltj).
D’n Umbelder zal uch roontelum 19:30 oor beej mekaar trommele woeënao vae de femiêlie en getuûge in ’t zunke zulle zette.
De Vorst enne Preens neme uch mej in ’t verhaol en make aan ‘t indj ouch ’t broêdspaar bekindj. Wejjae al weem ’t és?
D’r zal e börgelike voltrekking plaatsvînge doeër de “boetegewoeën-ambtenaar-vanne-börgelike-stând-vör-eine-daâg”, oeëze hoeëgheid en daonao zal d’n daeke de kerkelike zeîngel gaeve oeëver ’t körsvörse paar.
Nao ’t huwelik zal de broêdsstoet doeër de straote vanne Wieërter binnestad trékke ónger begeleiding vanne boorekepel. Tréktj en fieësj mej doeër de straote van oeës prachtige Wieërt. Tréftj mekaar en veertj de leefdje (dae van einen daâg) tot inne late eurkes.
't Broêdspaar van 2025
♦ Noortje Stroek
De broêd wêrktj al 16 jaor in ’t óngerwiês, 15 jaor daovan oppe Montessorischoeël in Wieërt
en seer e jäörke op OBS De Stapsteen in Hérte.
Ze woeëntj midde inne stad oppe singel en dao kin ze allein mér van geniete.
Op zaoterdig ’n rundje oeëver de mêrrentj en êrgus ’n hépke of ’n drênkske doon és ’n vast ritueel.
Inne weentjer de bérg aaf roetsje oppe ski’s en inne zoeëmer nao Oeësteriêk of Italië,
dét zeen de schoeënste verkânsies volges de broêd.
Vanaaf 11-11 begintj ’t te jeuke. Want de vastelaovendj zitj d’r al van jóngs aaf aan in.
Mét de Joekels op paad en later met De Rogstaekers. En mét eur vriendinne van VV Noeëts Mieër Nao Hoês bedînke ze eder jaor weer de schoeënste pékskes um dao mét te proonke met deej vastelaovendjdaag.
Ze és ’n dochter van ‘ne kleine, groeëte mins, namelik Jan van Corrie van Sjang van Gonnebertje en Leentje Lubsen en Jack van Bér en Marie van ’t waeverke.
En van Jenny van Bér Willems en van Corrie Willems-Rademakers.
De Broêd van 2025 és: Noortje Stroek
♦ David Winkelmolen
De broêdegom és ’t leefst ‘ne kieër of 4 inne waek aan ’t sporte in zien eige sportschoeël.
Dét mot ouch waal, want zien hobby’s zeen d’r eine drînke of uut aete.
Zelfs ’t momênt, dét ze hem vrooge vör broeëdegom, zoot hae aan de wiên.
En mét de vastelaovendj kojjae hém ouch vast en zieëker tieëge, want de traditie van vastelaovendj doeërgaeve aan de jónger generatie vingtj hae hieël belangriêk.
Mét de verkânsie gieët hae ’t leefst mét de caravan nao Italië of Frankriêk.
En tössedoeër ’n weekéndje wégk, dao és hae ouch waal vör te porre.
Dieëze mins hultj van haard wêrke, want hae hieët twieë bane.
Boete zien eige sportschoeël és hae ouch projectleider beej de Gemeindje Deurne.
Hae és ‘ne zoeën van Jan van Pierre van Daenen Wullem. En van Tiny Verlinden uut Belfeld.
De Broêdegom van 2025 és: David Winkelmolen
Aojers en getuûgen
♦ Fämke Gerits
De getuûge vanne Broêd wêrktj as verzörgendje, individuele begeleider beej Land van Horne.
Oftewaal same mét de bewoeëners boeëdschépkes doon, téske koffie drînke, vastelaovendj veere met dees minskes en same vastelaovendjlidjes zînge.
Dieës dame hieët as hobby’s zînge, uut aete, wândele en leuke dînger doon mét eur samegestéldj hoêshaoje.
Ze és ’n dochter van Wiek van Toeën van kefee Vrede en Vermaak oppe Beest van Sjeng en Wullemke Gerits. En van Toos van Jaopers-Sjaak uut Rooy.
Getuûge van de Broêd 2025 és: Fämke Gerits
♦ Lilian van Grimbergen
De moôder vanne Broêd wêrktj as regionaal beleidsadviseur beej ’t UWV.
Ze hultj van gezelligheid, ’t leefst mét ’n hépke, drênkske, ’n stökske kieës en ónger de minse.
En ze és hieëlemaol wégk van heur hung Lexi en Bowie. Wieër ’n ânger hobby és de politiek.
Dit deut ze beej de VVD inne gemeindjeraod van Wieërt. Heej moog ze aaf en tów mette hamer oppe taofel hawwe, want ze és ouch fractievuuërzitter van dieës perti-j.
Ze és ’n dochter van Jan “vanne ri-jschoeël” van Nol van Grimbergen en Netje Grimbergen-Huijerjans. En van Ida Ramakers van Ni-jwieërt.
Moôder vanne Broêd 2025 és: Lilian van Grimbergen
♦ Hans Stokbroeks
De vader vanne Broêd kiêktj gaer nao Formule 1 of rietj zelf nao Oeësteriêk um Max aan te moedige.
Vör zien wêrk zitj hae oppe brandwieërkazerne oppe aafdaeling operationele Vuuërbereidinge.
Hae deut gaer e pötje beer drînke of uut aete en woor oeëts lid van VV De Mooskniênkes.
Tiêdes de abdicatie op vastelaovendjdieënsdig hieët hae al ‘ne hieële houp Stadspreense de locht in gesteurdj met de lei-jerwage vanne brandwieër, en ’t leêfst zoeë hoeëg muuëgelik!
Hae és ‘ne zoeën van Mia Crouzen van Crouzen uut Mestreecht. En van Bert van Piet “De Sluiswachter” van Stokkers Thieu Stokbroeks!
Vader vanne Broêd 2025 és: Hans Stokbroeks
♦ Jelle Overheul
De getuûge vanne Broêdegom és beroepsmusicus in hért en neere, daonaeve és hae vanaaf 2021 lieërkracht primair ongerwiês beej Stichting MeerderWeert.
Hae és meister van groep 8 en vaklieërkracht meziek op IKC Luuëke.
Hae hultj van koeëke en sporte, és vreejwilliger beej VV De Rogstaekers en vanaaf de oprichting de driêvendje kracht van VV Neet te Kloppe!
Hae és ‘ne zoeën van Roos van Gerd van Bieëgdier en Frens van Geuve Pieër.
En van Jan van Hendrijntje van den Born en Willem Overheul van de Bokkeboor.
Getuûge van de Broêdegom 2025 és: Jelle Overheul
♦ Aihua Chung
De moôder vanne Broêdegom hultj van reîze um inspiratie op te doon vör heur wêrk.
Ze dânsj gaer Salsa en Bachata, en as ze de tiêd d’r vör hieët sportj ze ouch nog.
Bloômschikke en wat noets ontdékke of doon deut ze ouch gaer.
Daonaeve és ze eigenaar van ’n hieël bekindj restaurânt inne Stationstraot waat d’r al 50 jaor ligktj. En dao zeen vae allemaol waal ‘s mét ’n wit buulke nao boete geloûpe, sommige zelfs waekeliks.
Ze és in Wieërt geboeëre, ze kaltj dan waal gein Wieërs mér gae kuntj d’r gewoeën plat tieëge kalle.
Ze és ’n dochter van Kweitsen Chung-Wu en van Yung Chang Chung.
Moôder vanne Broêdegom 2025 és: Aihua Chung
♦ Ruud Kunnen
De vader vanne Broêdegom hieët aaf en tów ‘ne kwast in zien hang um in Wieërt en de wi-j umtrék duuëre en keziêne strak inne lak te zétte.
Meer ’t mieeëst zitj hae op kantoeër aanne Moeësdiêk.
In z’ne vreeje tiêd wêrktj hae gaer inne hoeëf, zétj zich in as vreejwilliger beej Bospop en ’t Oktoberfest. Daonaeve woor hae ouch productie-assistênt beej de Wieërter musicals.
Mér dao hultj ’t neet op, want hae és ouch jurylid vanne groeëte Rogstaekersoptocht!
Hae maaktj jaorliks schoeën en lang reize en inne wîntjer stieët hae gaer oppe latte.
Genogt gekaldj.
Hae és ‘ne zoeën van Frits vanne schilder uut d’Oospel en van Jet van ’t Heihuis van Nelleke van Janssen vanne Kieëntjerstraot
Vader vanne Broêdegom 2025 és: Ruud Kunnen
