Op woonsdig 11 fibberwarie 2026 és beej Notariaat In de Tiendschuur de oprichtingsakte van de Stichting LVK 2027 geteîkendj. De 51e finale van ’t Limburgs Vastelaovesleedjes Konkoer gieët plaatsvînge op vriêdig 29 jannewarie 2027 in Wieërt. Heejmej és de organisatie van dit groeëtschalig evenemênt officieel gevormdj.
Deep geworteldje lokaal organisatie
De now stichting wurtj gevormdj doeër Stadsvastelaovendjvereîniging De Rogstaekers en Stichting Bospop. Dieës WIeërter organisaties hebbe speciaal vör de organisatie van dieës LVK‑finale heur krachte gebundeldj. De Rogstaekers teîkene al mieër as 100 jaor vör de organisatie van de Wieërter vastelaovendj, óngerhând det Stichting Bospop heur expertise inzétj op ’t gebied van logistiek, veiligheid en terreîn-organisatie.
Now logo geprissentieërdj
Ouch ’t speciaal vör de LVK‑finale van 2027 ontwikkeldje logo woeërt geprissentieërdj. Centraal stieët ’t logo van de Stichting LVK. Vör de Wieërter editie zeen de gouwe rog van de Rogstaekers en ’t herkinbare uulke van Bospop tówgeveugdj. Dit allemaol in combinatie mét de Wieërter ‘skyline’, bestaondje uut de festivaltênt van Bospop, de Wilhelmus-Hubertus muuële, de statterbrök, de daekenale St. Martinuskêrk en de stasie vanne NS. ’t Logo és ontwôrpe doeër Kristiaan Litjens van Litjens Vormgeving.
Vuuërbereidinge volop aanne gang
Achter de schêrme wurtj al haard gewêrktj aan de vuuërbereifing van de finale. Stichting LVK Weert 2027 zâl op korte termiên de locatie bekindj make, woeë ’t fieëstpaviljoen zal waere opgebawdj. Dit paviljoen zal plaats beeje aan doêzendje Limburgse vastelaovendjveerders, di-j same kaome in Wieërt. Same mét hieël völ vreejwilligers zâl de organisatie towwêrke nao ’n spectaculaire 51e editie van de LVK-finale.
Kiektj ouch beej:
