De 51ste finale van ‘t Limburgs Vastelaovesleedjes Konkoer (LVK) gieët plaatsvînge oppe Statterbröklocatie aanne Schepenlaan in Wieërt. Det hieët de organisatie vandaag bekindj gemaaktj. De finale vingtj plaats op vriêdig 29 jannewarie 2027.
De gemeîndjeraod hieët op 23 september ingestumdj mét ’t vuuërstel um ’t terreîn aanne Statterbrök de kaomendje jaore te risservieëre vör evenemênte en parkieëre.
Um de locatie daovuuër baeter geschiktj te make, és ’t noeëdzakelik um de inrichting aan te passe en ’t terreîn te egalisieëre. De werkzaamhede starte dit naojaor zoeëdet dieës klaor zeen vuuër ’t kaomendje sezoen. Doeër dieës aanpassing és ’t terreîn ouch inne wîntjerperiode broêkbaar en daomej geschiktj vör de LVK-finale.
Oppe Statterbröklocatie zal e fieëstpaviljoen waere gebawdj det plaats beedj aan doêzendje Limburgse vastelaovesveerders. De organisatie ligktj in hang van Stadsvastelaovesvereîniging De Rogstaekers en Stichting Bospop. Zeuj zeen bli-j det de zeuktocht nao e geschikdje locatie és geslaagdj. ’t Terrein ligktj centraal in Wieërt en és daomej good bereikbaar.
De kaartverkoup vanne 51ste LVK-finale in Wieërt startj op zaoterdig 9 jannewarie 2027 um 13:00 oor via www.lvk2027.nl .