De organisatie vanne 51ste finale van ‘t LVK in Wieërt kân gruuëts de oeëpeningsact van 2027 aankondige. Nemes minder as de legendarische formatie Harry en de Gebroeëke Zwiêgelkes neemtj oppe daag vanne finale ‘t officieel vuuërprogramma vör heur raekening. Speciaal vör ‘t LVK in Wieërt kaome zeuj vör eîne kieër trök.
Hieël vastelaovendveerendj Limburg kiektj uut nao de groeëte finale aanne Statterbrök in Wieërt! Um de doêzendje bezeukers nog vuuër de start vanne finale inne perfecte fieëststumming te brînge, zocht de organisatie nao ‘ne absolute knaller van ‘n oeëpeningsact. En dét és gelöktj: met dit exclusief optraeje gaon Harry en de Gebroeëke Zwiêgelkes de tênt ongetwiêfeldj drek oppe kop zétte. Zeuj wêrme ‘t pebliek optimaal op, woeënao de striêd um ‘t bêste vastelaoveslidje van ‘t jaor écht kân losbörste.
Paviljoen oeëpentj um 17:00 oor
‘t Fieëstpaviljoen aanne Statterbrök zâl op de daag vanne finale al um 17:00 oor heur duure oeëpene vör ‘t pebliek. Zörgtj dejjae oppe tiêd binne zeêtj, want dit unieke, eînmaolig optraeje wildjae gewoeën neet misse. Zoeëgaw de tênt vôlstruîmtj, zulle de ieërste bekindje klânke van Harry klînke.
Kaartverkoup
Wildjae dit zeldzaam optraeje en de spectaculair finale mejmake? De kaartverkoup vör de 51ste LVK-finale in Wieërt startj op zaoterdig 9 jannewarie.
Haodj de website www.lvk2027.nl en de sociale media inne gate vör mieër informatie en ‘t léste nows.