2 FIBBERWARIE
19:30
Wieërter binnestad
't Boorebâl begintj oeëver:
- %D
- %H
- %M
Foto's van 't Boorebâl van 2026 vingdje inne:
Klômpe, klédje of ‘ne keel – laotj uch as boor es bekiêke!
’t Blieftj e spektakel: twieë schoeën Wieërter tortelduufkes di-j mekaar vînge innen onecht.
Zoeë wi-j ze in medialând oeëts zégke: de boor vingtj vraw.
Aafgeloupe jaor vónge Noortje Stroek en David Winkelmolen mekaar, mer noowdét dit huwelik vörbeej és moge vae dit jaor wéér geneête vanne pracht en praal van ’t Boorebâl!
Dieës traditie blieftj en waal dit jaor op 2 fibberwarie oppe Mêrrentj beej ’t aod stadhoês tieëgenoeëver de kêrk. Gae zeetj ammaol genuuëdj um getuûge te zeen van ’t mieëst bekindje (onechte) huwelik van ’t jaor.
Tréftj mekaar van te vuuëre inne binnenstad, woeë dejje beej de Wieërter tapperi-je kuntj geneête van écht booreaete, ónger ’t genot van e fein glaeske gerstenaat (ajje wiltj).
D’n Umbelder zal uch roontelum 19:30 oor beej mekaar trommele woeënao vae de femiêlie en getuûge in ’t zunke zulle zette.
De Vorst enne Preens neme uch mej in ’t verhaol en make aan ‘t indj ouch ’t broêdspaar bekindj. Wejjae al weem ’t és?
D’r zal e börgelike voltrekking plaatsvînge doeër de “boetegewoeën-ambtenaar-vanne-börgelike-stând-vör-eine-daâg”, oeëze hoeëgheid en daonao zal d’n daeke de kerkelike zeîngel gaeve oeëver ’t körsvörse paar.
Nao ’t huwelik zal de broêdsstoet doeër de straote vanne Wieërter binnestad trékke ónger begeleiding vanne boorekepel. Tréktj en fieësj mej doeër de straote van oeës prachtige Wieërt. Tréftj mekaar en veertj de leefdje (dae van einen daâg) tot inne late eurkes.
't Broêdspaar van 2026: Kelly Stultiens & Mike Grosfeld
De broêd stieët vör eur wêrk in Rooj veer daag vör de klas um di-j vanne boeëteni-jje wat beej te brînge. Ze és pas gelieëje gestartj beej de vreejwillige brandwieër,
dét wiltj zégke: neet um te blusse, allein kieke.
Ze hieët jaore inne horeca gewêrktj, vuuërnamelik beej de breurs Cardinaal.
Ze reisj de hieële werreldj oeëver en kin eder werreldjdeil aafvînke, ouch Bêls en Pruûses. As de zon d’r mer schientj, want ze és ’n écht zoeëmermins.
Ze és “Schmînck-Piet” beej de Stichting Sint Nicolaas Wieërt. Dét deut ze gaer en ze és dan ouch te vînge inne grime beej de musicals van Wieërt Amezieërtj um de spuuëlers te vuuërzeen van ’n läögske schmînck.
En as léste de Vastelaovendj. Dieës mevráw és hêlpendje hând beej BC Wieërters Echte en doeër ’t jaor haer gieët ze ouch nog 's regelmaotig mét De Kauvers op paad.
Op 13 mieërt 1990 waas ze d’r ineins. Ze és ’n dochter van Anja van Lei van Buchters Frenske en Nellie van An van de Schieëper.
De Broêd van 2026 és: Kelly Stultiens
De Broêdegom keumtj oppe vriêdigaovendj gaer beejein mét vrînde beej Scouting Sint Maarten. Gezéllig knuipkes légke, ’n boumhut bawwe of fikkie stoeëke in ziene roeëje bloes.
En oppe dieënsdig gieët hae gaer dânse beej Judith’s Dancepoint. Hae hieët zoeë ongevieërt alle stijldânstechnieke ónger de kni-j.
De rést vanne waek és hae aan ’t wêrk in zien eige zaak, di-j in 2027 al 100 jaor bestieët. Heej wêrktj hae same mét zien vader en opa.
Eur pak stoume, ’n pasfoto laote make of ‘ne nowwe hak ónger eure schoon, beej Grosfeld ésj te doon.
Hae és ‘ne zoeën van Pascal van Jo vanne schoonmaker en van Evelyn van Harrie en Mia van Heytse.
De Broêdegom van 2026 és: Mike Grosfeld
Aojers en getuûgen
♦ Linda Smeets
De getuûge vanne Broêd hultj vanne kleîn dinge in ’t laeve en ze és mich toch ’n perti-j muzikaal.
Haotj uch vast: ze és zangeres, zangdocênt, lidjesschriêfster en gaotj zoeë mer doeër.
As dejje neet kintj zinge, zeeje beej heur aan ’t gooje adrés, of gae motj écht neet kinne zinge, dan zieët ze ’t uch ouch.
Ze stieët op groeëte en klein podia en aafgeloupe waek zelfs inne Ziggo Dome!
Daonaeve hultj ze van dânse, en dan in ’t bezûndjer de Salsa en Bachata.
En woeë ze nog mieër van hultj zeen heur 3 zuuëns, oh jao en ouch van unne zieëkere Ivo…
Dieës muzikaal tânte és ’n dochter van Bert van Kamp Anna en van Lucie van Driena van Doeërewup.
Getuûge van de Broêd 2026 és: LInda Smeets
♦ Diana Janssen - Pols
De moôder vanne Broêd wêrktj al ruum 25 jaor inne aojerezörg beej Land van Horne op locatie Zuyderborgh op Kieëntj. En dét deut ze mét leefdje en plezeer.
Ze gieët gaer op paad mét vrînde of femiêlie. Ze hultj van oore klasjeneere mét ’n lékker drênkske of hepke. Mer ze kin ouch geneête van de röst thoês.
Vastelaovendj zitj eur in ’t blood en schmincke és wat ze gaer deut, achter de schêrme beej De Boonte Femiêlie Middig, mer ouch mét de vastelaovendj. Dan staon de minse inne ri-j um heur gezicht doeër dieës dame te laote vêrve.
Ze és ’n dochter van Tin van Nellie en Nico Pols uut Lâmpegaat Eindhoven. En van Leny van Mia van Reinderts Lieën en Tjeu van Harrie van Antje van Hale.
Moôder vanne Broêd 2026 és: Diana Janssen - Pols
♦ Paul Meevis
De vader vanne Broêd gieët gaer op verkânsie en hultj van borrele of lékker uut aete mét vrînde inne stad.
Mér dao gaoje dieëze mins neet van kinne.
’n Hôngsmang, ’n véssekom, kattevoor, ‘ne nowwe reem of wat vör eur vuuëgelke of eure kniên.
Allemaol te kriêge aanne Bieëkstraot, woeë dét hae same met 8 mejwêrkers al 30 jaor zien eige dierenspeciaalzaak hieët.
En now wejjae weem ’t és.
Hae és ‘ne zoeën van Toos van Pierre van Kets Coenraad en van Wim van Tuum van Letse Piet.
Vader vanne Broêd 2026 és: Paul Meevis
♦ Chico Keulen
De getuûge vanne Broêdegom kin geneête van de kleîn dînge in ‘t laeve: stökske wandele, filmke kieëke oppe bânk, nao de mêrrentj of klusse aan hoês en hoeëf.
Hae sportj aaf en tow (zieët hae) en volleybaltj recreatief beej VC Wieërt.
Dao és hae ouch nog as vreejwilliger.
Hae brawtj zien eige beer mét zien broor, vader en zwaoger in Hobbybrawweri-j “Onjeklonje”.
Same mét zien vraw hieët hae ‘n adviesbureau en hae hölptj uch aan ‘n energielabel of guftj uch advies as dejje ‘n now koeëj gaotj bawwe op Laorvêldj.
Dieëze fanatieke vastelaovendjveerder es ‘ne zoeën van Lou van Sjef van Keulen Driek en van Els van Thieu van Janke Bieële.
Getuûge van de Broêdegom 2026 és: Chico Keulen
♦ Miranda van Knippenberg
De moôder vanne Broêdegom wêrktj al 19 jaor mét hieël völ plezeer en leefdje beej WBC oppe Maaslandlaan. Det és ’n woeëngroep vör minse mét ’n ernstige mieërvoudige bepêrking.
In eur jóngere jaore hieët ze ’t dék boont gemaaktj mét Balletgroep De Flamingo’s, mét ânger wuuërd op meinig Boonte Aovendj gedânsj!
Mét heur groeëte vrîndin Gerdy begintj de vastelaovendj op de 11de vanne 11de beej De Tram. En vanaaf dae tiêd prebiere ze eder fieëst mej te fieëste.
Ze és ’n dochter van Harrie van Knip Driek en van Ria van Smidje vanne Maelmuuële
Moôder vanne Broêdegom 2026 és: Miranda van Knippenberg
♦ Cees Metz
De vader vanne Broêdegom zitj de hieële daag te kluuëre en te teîkene op zien wêrk, en ouch gumme, hieël völ gumme. En asj dan klaor és, dan bawwe ze det en dan és hae dao hérstikke gruuëts op, mer de minse di-j d’r gaon wêrke of woeëne ouch.
Dieëze mins és architect van kleîn of groeëte gebouwe, apartemênte, wuuëninge op Laorvéldj of Boswaard en zélfs van ’t crematorium. Hae drèjtj d’r zien hand neet vör um. Waal zien potloeëd as hae mot gumme.
Zînge és zien hobby, hae zingtj beej Manoeuvre, bekindj van ‘t Tapzînge en de Boonte Aovendj. Mér ouch inne Wieërter musicals, zoeëwi-j Graaf van Horne en Antje.
Dieëze Bourgondiër és ‘ne zoeën van Cornelis, dae oeëts Preens Krelis waas vanne Philips glujlâmpefebriek in Wieërt, en van Mieke Witteveen, de klei-jermakersdochter.
Vader vanne Broêdegom 2026 és: Cees Metz
