Optochtbâl VÖR EDEREÎN

 
Vör ederein dae d'r op vriêdig 21 fibberwarie neet beej kós zeen of dae 't nog (dik of) dun oeëver wiltj doon és d'r oppe zaoterdigge aovendj 'n Optochtbâl VÖR EDEREÎN.

Waantj uch in 't Wîldje Weste tiêdes dit optochtbâl.
Dootj uch eur schoeënste cowboypekske aan (of wat ângers gezelligs inne Vastelaovendjsfeer) en geneêtj van 'n aovendj ângers as ângers.
't Francishoês wurtj umgetoûverdj in 'n échte saloon. Gae kuntj eur kwaliteite as cowboy laote zeen op Waerse Wullem, 'n mechanische stier.

Tiêdes 'n dael vanne aovendj huuërdje Ingelse texmex- en countrymeziek van de Wieërter band Tony's T-Mex. Mer dao naeve zeen d'r ouch genog 'echte' vastelaovendjoptraejes van Big Benny en Moerepetazie.

D'n entree vör dieëze aovendj és hieëlemaol vör niks en ederein és welkom!
Zeen vae uch 22 fibberwarie vanaaf 20:00 oor in 't Francishoês?
Gaer wis dan.