Aan alles keumtj 'n îndj, ouch aan 'n 9x11 Jubileumsezoen. Mer waat kujje uch dan nog mieër wînse, dan det 't wurtj aafgesloeëte mét twieë Preense, di-j doeër edereîn op hang woeërte gedrage. En det hebbe ze mét (9x11 + 1) % verdeendj, want dieës kanjers hebbe in de periode det ze mét hoeëgheid waerdje aangesproeëke, laote zeen, det 't gewoeën twieë Wieërter joonges zeen, di-j zjuust wi-j edereîn kaome uut 'n Stad van Edereîn. (foto's Johan Horst)
63 Foto's
Oppe dieënsdig lutj neet alleîn aankaomendj talênt zich gelde tiêdes 't Oeëpe podium, mer ouch de gevestigdje artieste laote dan gaer nog 's van zich huuëre. En det kân 't pebliek alleîn mer waardieëre. (foto's Johan Horst)
50 Foto's
Ouch de wichter, di-j mejdieëje aan eure eige optocht, haaje 'n groeët en enthousiast pebliek. Doeër de lekker schiênendje zon koeëme de kluuëre nog mieër tot hun recht en och, as d'r al 's 'n gaat vieël, dao maaldje nemus um. Geneête van begîn wis îndj. (foto's Jan Lormans)
118 Foto's
Kwaliteit, kluuër en knauwel, det ware de 3 K's van de Rogstaekersoptocht, woeëvan doêzendje minse langs de Wieërter singels koste geneete op zondig 3 mieërt. En det allemaol ónger 'n straolendj zunke. De daelnemers haaje zich uutgestöktj um zoeë good muuëgelik vör de daag te kaome. De eîne kieër lökdje det wat baeter as de ângere. Uut de waarderinge van de jury bliêk waal, det de daelnemers oeëver 't algemeîn kwalitatief zieër good wêrk haaje aafgeleverdj. (foto's Johan Horst)
77 Foto's
Nao 't ophânge van de Rog woeërt mét 't Preensebâl de vastelaovendj pas echt geoeëpendj. Allerieërst verschieën de Um Te Bäöke Bent op 't podium, um later te waere aafgelosj doeër Plat Wieërs, det neet alleîn de aovendj aafsloeët, mer ouch de eige carrière van 30 jaor. Mer geluîf mer: ouch oeëver 30 jaor zînge ze nog oeëver "Beej Dong Long" en "Karel és 'n maegtje". (foto's Jan Lormans / Johan Horst)
84 Foto's
Daeke Jack Honings ging vuuër tiêdes de Heilige Vastelaovendjmès op zaoterdig 1 mieërt 2025 in de dekenale Sint Martinuskerk. Hae woeërt daobeej óngerstuuëndj doeër Zangvereîniging Laor o.l.v. Anne-Marie Moors en doeër 'n gelaegenheidskepèl o.l.v. Rick van Lierop. (foto's Johan Horst)
62 Foto's
't Waas weer e fieësje in 't stadhoês op zaoterdig 1 mieërt. Jeugdpreens Lex I en Stadspreens Stefan II krieëge achtereînvolges de kleine en de groeëte sluuëtel van de stadsporte uutgereiktj doeër Opper-Opper Rogstaeker Rymond Vlecken. En daomej was vör 3 daag de Macht aan 't Vôlk 'n feit. As teîken heejvan woeërt nao de Vastelaovendjmès de Wieërter Rog opgehânge beej 't aod stadhoês oppe Mêrrentj. (foto's Johan Horst)
118 Foto's
Oppe vriêdig begós de Vastelaovendj al mét 'ne middig, speciaal vör de scholiere. 't Waas neet al te drök, mer degieëne, di-j d'r ware, heb zich köstelik geammesieërdj mét de aanwieëzige artieste. DJ Admin, Noa Veltrop, de Broeëds Brothers, Mark & Wilhelmien, Mark Gruijthuijsen, Femke, Ed & Frans en Moerepetazie goeëve zich vör mieër as 100% um 't de aanwieëzige nao de zin te make. (foto's Johan Horst)
53 Foto's
Op zoondigemiddig 23 fibberwarie koeëm d'r 'n îndj aan 't 9x11 Jubileumweekend. Naodet smêrreges talloze vreejwilligers van de jaorige Rogstaekers woeërte getraktieërdj op spek en ei-jer beej 'n ongedwônge Frühschoppen, waas d'r smiddigs volop tiêd gerisservieërdj vör de aojer ónger os, di-j dèk vergezeldj waerdje doeër jonger femiêlielede um d'r zoeë 'n gezellig uutstepke van te make. Mét dânk aan de noeëdige sponsors krieëg edere aanwieëzige 'n gratis tas koffie mét 'n stökske vlaaj aangeboeëje. Mer ouch de meziek van Thei en Mary, Preens Stefan II en Mark & Wilhelmien ging d'r in wi-j de spraekwoeërdelike kook tiêdes dieëze Vastelaovendjmatinee. (foto's Johan Horst)
104 Foto's
Naodet Big Benny de aanwieëzige beej 't Optochtbâl in 't Franciscushoês lekker haaj opgewêrmdj en Ni Normaal de vuuërig jaor gewonne Gouwe Rog haaje ingeruuëldj vör 'n kleiner ingeliêsj exemplaar, waas 't de buurt aan Tony's T-Mex um hun gezellige klânke oeëver de minse uut te strawwe. En nao wat oefene bliêk Preens Stefan II 't linedancen al behuuërlik ónger de kni-j te hebbe. Myrthe Peeters blieëf 't langst oppe rögk van Waerse Wullem, de bokkige stier, zitte en Moerepetazie sloeët aaf mét 'n optraeje mét völ interactie, woeëbeej Iryn, de jaorige vraw van Stefan, same mét Robbie Snoek eur gelök op de stier ouch nog 's ging uutteste, dit tot hilariteit van 't enthousiaste pebliek. (foto's Johan Horst)
72 Foto's
Altiêd gezellig, zoeëne wichterfieëstmiddig. Ouch dae van zaoterdig 22 fibberwarie mét Jeugdpreens Lex I as vuuërgènger vieël weer inne smaak beej de wichter, mer ouch beej de vaders en moôders en de opa's en oma's. En 't és neteurlik ouch schoeën um de Huppelpupkes te zeen dânse en um same met Harrie en de GZ 2.0 te gaon belle, woeë di-j frikkedel blieftj. De dames van Lînks & Rechts brachte met eure meziek de schwung d'r in. De jeugd van de Vêrkusköp en de Brökwagters koeëme mét eur prînselik gevolg ouch op bezeuk en de Groeëte Preens, ZDH Stefan II, dae kriegtj mét zien schoeën lidjes de hieële zaal in 'ne polonaise, dus det waas ammesieëre van begîn tot îndj. (foto's Johan Horst)
71 Foto's
De Internationale Jubiläumsitzung op vriêdig 21 fibberwarie waas 'n ongekindj succes. Vanaaf 't memênt det de Rogstaekers mét völ tamtam 't Franciscushoês binnekwame wis aan de slotakkoeërde van oeës aller Beppie Kraft waas 't eîn groeët fieëst: Tig kepèlle di-j same o.l.v. Tjeu Snoek de longe uut 't liêf blaoze. Ton Wolter, dae 't Bronsgroen Eikenhout deut herlaeve in 't beejzeen van gouverneur Emile Roemer. Marjolein Heijltjes, die de hieël Raod van Elf zoeë wiêt kriegtj det ze luchtgitaar staon te spuuële, mét 'ne Vorst vuuërop as 'ne vollieërdje Slash. 'ne Preens Stefan II, dae as de bekindje vès in 't water oppe bühn stieët en edereîn aan 't drejje kriegtj, terwiêl hae det zelf neet hoof te doon. 'n Groeët blik Wieërter artieste, det wurtj oeëpegetrokke, mer waat 't lekkerste kukske vör 't létst bewaartj en same 't nummer "Gaeftj mich Wieert mer met Vastelaovendj" lutj huuëre. 'n Onvermeujbare Beppie Kraft, di-j de zaal aan 't îndj vanne aovendj, begîn vanne nacht, weer hieëlemaol mejkriegtj. En neteurlik neet te vergaete de daverendje show van de Keulse dânsgroep Die Höppemötzjer, woeë de vröllie as elegânte vuuëgelkes doeër de locht vlege. Al mét al 'n ongeleuflik begÎn van 'n jubileumweekend van de 9x11 jaorige Rogstaekers. (Foto's: Johan Horst)
145 Foto's
Tot verrassing van völ umstanders woeërte Noortje Stroek en David Winkelmolen as 'n straolendj broêdspaar vuuërgesteldj beej ‘t Boorebâl. Getuûgen ware Fämke Gerits en Jelle Overheul. As aojers van de broêd fungieërdje Lilian van Grimbergen en Hans Stokbroeks, beej de broedegom ware det Aihua Chung en Ruud Kunnen. (foto’s: Johan Horst)
84 Foto's
Op zoondig 9 fibberwarie 2025 zeen de 9x11-jaorige Rogstaekers op bezeuk gegânge beej de 8x11-jaorige D'n Uul in Remundj. De vereîniginge mét eur beide jubileumpreense en gevolge hebbe mekaar gefillisitieërdj met eur jubileum en oeëver en weer woeërte de noeëdige ongerschei-jinge uutgereiktj tiêdes dit plezânt samezeen. Harry Allers, hoffotograaf van D'n Uul, waas d'r beej en maakdje dieës reportage.
56 Foto's
De nowwe opzet beej de vuuërstellinge van de Boonte Aovendje és ’n groeët succes geblieëke. De samewêrking tösse artieste, hoêsorkest B.O.V.A.G., zangkoeër Manoeuvre en dânsgroep One in Motion maakdje d'r 'n flitsendj spektakel van mét kluuër en humor. 't Waas echt "neet te filme". (foto's: Johan Horst)
87 Foto's
De artieste van de Boonte Femiliêmiddig hebbe ouch dit jaor de wichter geammesieërdj mét 'n flitsendje vuuërstelling, di-j de jeugd royaal aan 't lache hieët gemaaktj. Allebej de vuuërstellinge woeërte drök bezochtj met wichter, pap en mam, opa en opa en vör de rest edereîn, dae nog joonk van geîst és. (foto's: Johan Horst)
54 Foto's
Aan 't îndj van de Gala Boonte Aovendj op zaoterdig 1 fibberwarie 2025 woeërt Stefan Wolter uutgeroope tot Stadspreens Stefan II van de Rogstaekers. Stefan II hieët de "Orde vanne Zîngendje Zwetser" ingesteldj. Hae regieërtj ónger zien devies "Dit és zoeë schoeën, baeter gaon vae ’t neet kriêge!" (foto's: Johan Horst)
46 Foto's
Beej binnekomst woeërte de gaste van de Gala Boonte Aovendj, asze det wooeëje, op de geveulige plaat gezatte: 't begîn van 'ne fieëstelike aovendj mét de uutroping van Preens Stefan II as hoeëgtepûnt (foto's Jan Lormans)
123 Foto's
Aan 't îndj van de Boonte Femiêliemiddig op zaoterdig 1 fibberwarie 2025 woeërt Lex Willekens uutgeroope tot Jeugdpreens Lex I van de Rogstaekers. Lex I hieët de "Orde van 't Braaf Mènke" ingesteldj. Hae regieërtj ónger zien devies "Wichter neet te braaf, Kaaktj met mich mej: Wieërt ALAAF, Wieërt ALAAF, Wieërt ALAAF!" (foto's: Johan Horst)
15 Foto's
Tiêdes de Bontje Aovendj van donderdig 30 jannewarie 2025 woeërt aan Marie-Louise van den Bosch de Orde van 't Kammeräödje uutgereiktj. Johan Horst waas d'r beej um dit vast te légke.
8 Foto's
Zaoterdig 18 jannewarie 2025 zeen de Huppelpukes en de Jeugdraod van 11 van de Rogstaekers in eur now samestélling geïnstallieërdj. Naodet vuuërig jaor de Huppelpupkes al volledig in 't now zeen gestoeëke, waas dits kieër de Jeugdraod aane buurt. Allemaol 'n now cape en 'n schoeën blaw-witte staek met ouch dao-op 't logo van de Rogstaekers en 't waope van Wieërt, zjuust wi-j beej eur volwassen vereînigingsgenoeëte. De jónges vanzelfspraekendj met 'n nette zwerte bóks en lakscheunkes, de maegdjes mét 'n plissé rökske, zwérte maillots en înkellaerskes inne zelfdje kluuër. (foto's: Jan Lormans)
60 Foto's
Tiêdes ’n fieëstelike sirremonie in ’t stadhoês van Aoke ontving Wieërt zaoterdig 23 november officieel de titel “Europese cultuur- en carnavalsstad 2025”. Dieës bezûndjer erkinning woeërt tówgekindj doeër de Närrische Europäische Gemeinschaft (NEG) en ieërder cultuurstieëj. De delegatie uut Wieërt, ónger aanveuring van Stadsvastelaovendjvereîniging De Rogstaekers, noeëm de óngerscheî-jing mét enthousiasme in ontvângst. (foto's Johan Horst)
16 Foto's
Op zaoterdig 15 november 2024 waas de oeëpening van 't Vastelaovendjsezoen 2025. Det gebuuërdje op het Raphaëlpaad met 't ontstaeke van 't Vastelaovendjveur. Dit in aanwieëzigheid van Opper-Opper Rogstaeker börgemeister Raymond Vlecken, Mark Koppen, de ontwêrper van de 9x11 Jubileummedalie, en aafvaardiginge van völ Wieërter vastelaovendjvereîniginge. 't Waas ouch de ieërste kieër det Kanseleer Roland in de oeëpebaarheid troeëj. Fotograaf Johan Horst waas d'r ouch beej.
90 Foto's
