Fotoalbum 2026

Neteurlik és de Rogstaekersoptocht 't hoeëgtepûnt vanne vastelaovendj en saoves laat zeeje beej de winnaars van de belangriêkste priêze volop traone van bliêdschap. Zoeë hieël ângers és de dieënsdig, wanneer sommige Huppelpupkes en lede vanne Jeugdraod van 11, zjuust wi-j de Preense, aafscheid motte neme en de traone de vreeje loup laote. En 't zeen noow net di-j emoties, di-j vör völ minse de betrekkelikheid van de Vastelaovendj typieëre. En daorum dao gein memênt van wille misse. Ze staeke de koppe bee-jein en lujje same de drej schoeënste daag van 't jaor uut. Al dieës kopkes ware getuûge van de letste ore. Dit foto-album as toegift van Vastelaovendj 2026. Saluut!

142 Foto's

't És Vastelaovendjdieënsdig en de wiêzers vanne klok tikke tieëge acht or saoves aan. De twieë preense hebbe same mét hun gezelschappe en de Rogstaekers hun galgemaal genoeëte en staon op 't pûnt um al hun privileges in te mótte leêvere. Niks mieër hieërser oeëver Wieërt, niks meer Preens mét de aanspraektitel Hoeëgheid. Ze waere weer Henk Coenen en Casper Winters. Oké, ze moge ieërst nog 't Roggebieëst tot as laote verbörre, mer dan ésj toch echt aafgeloupe. Wégk vaere, mântel en sluuëtel en dan gaon ze op in de spraekwoeërdelike rouk. D'r és gezûmptj en de traone roldje uut meinig aug. Vastelaovendj 2026 és vörbeej.

130 Foto's

D'r vieël aaf en tow wat naatigheid, mer de lôl waas d'r neet minder um beej 't Oeëpe Podium. Muzikaal gezeen koszje alle kânte op. Artieste, wi-j Linda Heuvelmans, Nick van Ham, Harry 2.0, Noa Veltrop en De Gruijt um d'r mer e paar te neume, wisseldje mekaar aaf. De Huppelpupkes dieëje in de "binne-arena" van de vuuërtênt vör de letste kieër 't 2026-dênske, woeëbeej vanwege 't aafscheid van 'n aantal "dansmarietjes op laeftiêd" al de noeëdige träönkes oeëver de wange biggeldje. En det neet alleîn beej de maegtjes, mer ouch beej de aojers. Jelle Overheul waas de perfecte dirigênt vör de verzameldje kapèlle, di-j trommeldje en blaozje as of d'r eur laeve vanaaf hing. En wat later oppe middig noeëm de (jonge) jeugd mét microfoons bezit van 't podium um de nówste lidjes feilloos ten geheure te brînge.

74 Foto's

Waat echt opvieël beej dieëze wichteroptocht waas (gelökkig!) 't groeëte aantal aanmeldinge en dan mét name beej de deîlnemerkes vör de Kleine Gouwe Rog. Det zeen de wichter di-j mejdoon mét 'ne zelfgemaakdje kop. Leefst 13 vanne 20 optochtnummers, di-j mejdieëje vör de priêze in dieës categorie maakdje 't de jury knap lastig. Beej de Zûlvere Knoeëk (det zeen de groepe mét wichter en groeëte minse doeëreîn) ware viêf kânshebbers. En beej de Broonze Bakfiets met twieë deîlnemers, woeë det 't vörnamelik um de wichter gieët, di-j mét 'n kèrke mejtrekke, waas 't verschil in pûnte hieël êrg klein!

21 Foto's

En alweer haaje ve gelök mét 't waer. Al di-j wichter, di-j mej dieëje aan eure eige optocht, koeëme druuëg aan beej 't podium, woeë det ze as beloeëning 'ne snuikbuul én ouch nog 'n herinneringsmedalie krieëge. Nao aafloup van 'ne optocht, woeë dejje as pebliek allein mer kosj geneête van al di-j bli-j gezichtjes inne stoet. Det waas de beloeëning vör de minse langs de kânt. Mer 't ging um mieër dan wat snuik en 'n medalie. Det blieëk waal beej de prieësuitreiking.

65 Foto's

Nao d'n optocht lieët Kuuëning Weentjer zich wul gelde en det beteîkendje det 't op völ plaatse naat en glaad waas. Mer det maakdje vör de optochtdeîlnemers en de haarde kern van vastelaovendjveerders niks uut: ze ware d'rbeej wi-j de priêsuutreiking begós. De Roggebieëste haaldje mét eur Euroactie mer leefst € 3.036,24 op! Chapeau! En mer waat gaer koeëme de deîlnemers eur vaantje en priês ophale en vör sommige waas d'r ouch 'n schoeën oorkonde vör de creatie mét 't hoeëgste aantal pûnte. Mer 't fieëst ging pas echt los beej de bekindjmaking van de Knauwelpriês en de winnaar van de Gouwe Rog.

67 Foto's

D'r waas qua waer wul code Gael vurspeldj, mer tiêdes de 88e Rogstaekersoptocht waas 't allemaol code Roeëd, Gael en Greun waat de klok sloeëg. Volop kluuër, humor en originele ideeë. Neteurlik ware de Straotvêrkus weer presênt mét eure onmiskenbare humor, good vör alweer 'ne verdeendje Knouwelpriês. En ouch 'n paar hieël schoeën wages, mer dae van de Hêldje op Zök sloeëg alles. Prachtige schildpadde in allerli-j kluuëre, formate en standjes. 't Kos neet ângers of dit waas de Gouwe Rog en det ouch nog mét 197 van de 200 beschikbaar pûnte, 't op 1 pûnt nao hoeëgste aantal, waat oeëts és towgekindj.

134 Foto's

De sluuëteloeëverdacht op 14 fibberwarie 2026 waas e fieëstje op zich. 't College van B&W, mer ouch 't preenselik gezelschap haaj zich good uutgestöktj um edereîn oppe hak te neme. En 't kós haost neet ângers of Valentijnsdag most waal é groeëte rol spuuële in dieës ceremonie, woeëbeej 't stadsbesteur de macht 3 daag in hang guftj van oeës Wieërter preense. En dao huuërtj neteurlik meziek beej. Mer op welke meneer, dao haaj ZDH Henk III zich vantevuuëre toch 'n hieël ânger bieëldj beej gedachtj. Want dao stonge ineîns mieër as 100 muzikânte zich de longe uut 't liêf te blaoze. Hinnevêl!

60 Foto's

De Vastelaovendj Matinee, dae de aafsloêting vormdje van 't Rogstaekers Fieëstweekend in 't Franciscushoês, waas 'n editie di-j joonk en aod bee-jein bracht. En det waas, zjuust as beej de Wichterfieëstmiddig, de ideale mix van aanwieëzige: vör eder wat wils. De Huppelpupkes goeszje weer mét de beinkes of det 't niks waas. En ouch de meziek en lidjes van Stefan Wolter, Mark & Wilhelmien en Thei & Mary ginge d'r in wi-j de bekindje gesnieëje kook. Zjuust (mer dan letterlik) wi-j de vlaaj en de royaal aangeboeëje snacks. Terecht waas d'r applaus, toen Vorst Jasper Medicura bedânkdje vör de sponsoring van dieëze middig en Theo Houben vör 't aanbeeje van de vlaai.

87 Foto's

Mét of sónger möts: edereîn waas good gemötsj op 't Fieëst vanne Good Gemötszje, zaoterdig 7 fibberwarie 2026 in 't Franciscushoês. De winnaars vanne Knouwelpriês (Duo Vae Dre-j en Driek) en de Gouwe Rog (VV de Hêldje op Zök) woeërte nog 's in 't zönke gezatte en krieêge eure herinneringspriês. Ouch krieêge mieërdere minse e bliêk van waardieëring van de Rogstaekers in de vorm van 'n medalie. Mer boeëvenâl woeërt d'r volop mejgezoonge en gedânsj oppe meziek van artieste as De Köpkes, Nick van Ham, Pruuf Mar, Moerepetazie en Van Lieshout & Arts. En neteurlik blaozje diverse kapèlle d'r lóstig op los. Fieëst!

112 Foto's

Waat waas det weer e fieëst op dae Wichtermiddig in 't Franciscushoês op zaoterdig 7 fibberwarie 2026. Ongedwoonge lavieërdje di-j klein tösse di-j groeëte minse en edereîn pakdje zich ónger d'n êrm. Clown Desalles blaozje zich de longe uut zien liêf, mer krieëg volop waardieëring van de jeugd vör zien balloncreaties. D'r woeërte polonaises geloupe, gedânsj oppe meziek van Moerepetazie en volop mejgepômptj beej det hilarische nummer van Deindânger. De Huppelpupkes mogte eur verdeêndj applaus in ontvangst neme en diverse aanwieëzige eur al aeve verdeêndje medalie. En tössedoeër krieëg de Optochtkemisse de wisselpriêze trök, zoeëdet de Zulvere Knoeëk en de Broonze Bakfiets weer kunne waere uutgereiktj tiêdes de Wichteroptocht.

95 Foto's

't Rogstaekers Fieëstweekend in 't Franciscushoês oppe Beest begós oppe vriêdig mét de hertstikke gezellige Vastelaovendj Sitzung. De Percussieband Scobra Doedelzakken wist ouch 't Bronsgroen Eikenhout uut de pipes te blaoze. Blaoze dieëje ouch de diverse Wieërter blaoskapèlle. Patty Pam Pam uut 't verre zuide van Limburg bracht de Schwung d'rin mét echte Wieërter vlaaj. Beej de Tanzgarde ‘Vegder Diddeldöpcher St. Vith’ vloêge neet alleîn de beinkes doeër de locht, meer ouch de vröllie, di-j d'r beej huuërdje. Thorsten von Lippe Biesterfeld wist wi-j altiêd de enthousiaste aanwieëzige aan 't zînge te kriêge en aafsloêter Marjolein Heijltjes kriêg neet alleîn 't pebliek, mer ouch de Rogstaekers aan 't dânse.

122 Foto's

De getuûgen en de aojers van 't broêdspaar ware in de dage, vuuëraafgaondj aan 't eigelike fieëst, al vuuërgestéldj: Linda Smeets en Chico Keulen as getuûge, Diana Janssen-Pols en Paul Meevis as aojers vanne broêd en Miranda van Knippenberg en Cees Metz as aojers vanne broêdegom. Mer oppe daag zelf woeërte Kelly Stultiens en Mike Grosfeld 't straolendj middelpûnt van de Boorebroêloft 2026.

34 Foto's

Zaoterdig 31 jannewarie 2026 waasj weer zoeë wiêt: Ziene Hoeëgheid Preens Henk III ging same mét 'n gedeîldje vanne optochtkemissie van de Rogstaekers Wages Kieke. Dan wurtj d'r 'n bezeuk gebrachtj aan de wagebawwers, di-j mejdoon aanne Rogstaekersoptocht. Preens Henk ging mét hieël wat minse in gesprek en vroeëg ze 't heume van 't liêf. Op 15 fibberwarie zuuëtj hae en hieël Wieërt waat d'r van hun wêrk és gewoeëre.

18 Foto's

De Boonte Aovendje van 2026 zeen vörbeej. Viêf vuuërstellinge mét vaste elemênte, mer dék toch mét verrassendje wendinge: de eîne kieër, umdet 't baeter of lolliger és, de ângere kieër um ouch de mede-artieste oppe bühne 'ne kieër op 't verkieërdje beîn te zétte. Want ouch dét és vastelaovendj.

195 Foto's

Ouch de Boonte Femiêlie Middige zeen achter de rögk. De wichter hebbe kunne geneête van leuke sketches, lidjes en nog völ mieër lollige memênte, mer hoeëgtepûnt waas oppe zaoterdig neteurlik de uutroping van de Jeugdpreens 2026: Casper I.

30 Foto's

Beej hun aankomst in 't Hotel op Stêlte woeërte de aanwieëzige van de Gala Boonte Aovendj ontvânge doeër twieë vrîntelike piccolo's, di-j van begîn tot indj mét 'n lachendj gezicht al di-j koffers versjawdje, zoeëdet 't de gaste aan niks kós ontbraeke.

119 Foto's

Zoondig 11 jannewarie 2026 woeërt beej de SooS oppe Mêrrentj de finale gehaoje van 't Wieërter Vastelaovendj Lidjes Festival (WVLF). In totaal woeëre d'r acht finaliste. Oppe 3e plaats eindigdje Stefan Wolter (Laaj di-j laaj leeg), 2e woeërte Deindânger ft. ALAAV (Poompe) en de winnaar van de Fried van Dooren Wisseltrofee ging van Moerepetazie, de winnaars van 2025, oeëver nao Nick van Ham, dae mét zien (pop) Harriëtte duuëdelik de leêveling van 't in groeëte getale aanwieëzige pebliek waas.

45 Foto's

Zaoterdig 10 jannewarie 2026 vóng de installatie plaats vanne Jeugdraod van 11 en van de Huppelpupkes. Umdet d'r vuuërig jaor e groeëte groep nówwelinge és begonne, waas d'r dits kieër mer 'ne kleîne aanwas. Eîn van di-j nówwelinge waas de ieërste Jeugdvorstin, di-j de Rogstaekers in eur 100-jaorig bestaon kunne welkom heîte. En di-j ieër és vör de 10-jaorige Lot Willekens.

36 Foto's

Harmonie St. Joseph 1880 spuuëldje de sterre vanne hiêmel tiêdes 'n concert mét "100 Jaor Wieërter Vastelaovendjmeziek" as thema. Ónger leiding van dirigênt Bart Deckers wist de hermeni-j zich óngerstuuëndj doeër de inzet van Ronald en Carien Moonen, Esther Snijders, Stefan Wolter en Ton Wolter as soliste. De meziek waas 'n fieëst van herkinning en ging d'r beej 't pebliek, det zich ouch rejaal lieët huuëre, in wi-j de bekindje gesnieëje kook. De mét humor doeërspekdje prissentatie waas in hang van Gijs Wullems en Brenda Wijen. 't Concert woeërt vanzelfspraekendj aafgesloête mét de hymne "Vae zeen as Rogstaekers geboeëre", woeënao 'n daverendj applaus alle mejwêrkers ten deîl vieël. Johan Horst en Jan Lormans ware d'r beej um 't eîn en ânger vast te légke.

82 Foto's