De samewêrking tösse Harmonie St. Joseph 1880 en Stadsvastelaovendjvereîniging De Rogstaekers um 'n concert oppe plênk te zette mét dao-in alleîn mer Wieërter vastelaovendjlidjes uut de létste 100 jaor, vóng zaoterdig 22 november zien apotheose in 't Munttheater in Wieërt. Tiêdes twieë vuuërstellinge kos 't pebliek geneête van lidjes uut 'n langer verlieëje, meer ouch uut recênter jaore. Feit waas waal de groeëte maote van herkinning en völ lidjes woeërte dan ouch volop mejgezônge.
100 Jaor Wieërter Vastelaovendj-lidjes: maaktj dao mer es 'n kuuës uut um daomej 'n concert van twieë oor te völle. Carla van Dooren hieët zich dao es röstig vör gezatte en de opbringst van dieës inspanninge waas d'r eîne um doeër e ringske te hale. Frits Kessels jr. kós toen aanne slaag um vör al di-j uutgekoeëze lidjes de arrangemênte te gaon schriêve en det és vör zoeë 'n uutgebrèdje hermeni-j wi-j St. Joseph 1880 gein sinecure. De hermeni-j o.l.v. Bart Deckers sloeëg aan 't rippetieëre en vör de zânk woeërt 'n beroop gedaon op Wieërter artieste, di-j eur spoeëre al hebbe verdeendj.
En op 22 november waasj zoeë wiêt. Hermeni-j-vuuërzitter Nico Snellen en Rogstaekersvorst Jasper dieëje de introductie, woeënao 't spektakel kos beginne. Harmonie St. Joseph 1880 spuuëldje de sterre vanne hiêmel tiêdes 't concert mét "100 Jaor Wieërter Vastelaovendjmeziek" as thema. Ronald en Carien Moonen, Esther Snijders, Stefan Wolter en Ton Wolter brachte de vör völ minse nog bekindje tekste tot laeve.
't Pebliek genoeët van al di-j lidjes, di-j d'r in ginge wi-j de bekindje gesnieëje kook. De mét humor doeërspekdje prissentatie waas in hang van Gijs Wullems en Brenda Wijen. 't Concert woeërt vanzelfspraekendj aafgesloeëte mét de hymne "Vae zeen as Rogstaekers geboeëre", woeënao 'n daverendj applaus alle mejwêrkers ten deîl vieël.
Johan Horst en Jan Lormans ware d'r beej um 't eîn en ânger vast te légke.
