't Weekend van 6 t/m 8 fibberwarie 2026 stóng in 't teîken van 't Rogstaekers Fieëstweekend in 't Franciscushoês oppe Beest. En fieëst waasj! Det koeëm neet alleîn doeër de schoeën aanklei-jing van de ruuëmdje, mer ouch (en messchien wul vörâl) doeër de gooj programmieëring. As d'r noow nog minse zeen, di-j te klage hebbe, dan zeen di-j geboeëre as aziendrînker. Kiekt nog mer 's trök!
Vastelaovendj Sitzung
't Rogstaekers Fieëstweekend in 't Franciscushoês oppe Beest begós oppe vriêdig mét de hertstikke gezellige Vastelaovendj Sitzung. De Percussieband Scobra Doedelzakken wist ouch 't Bronsgroen Eikenhout uut de pipes te blaoze. Blaoze dieëje ouch de diverse Wieërter blaoskapèlle. Patty Pam Pam uut 't verre zuide van Limburg bracht de Schwung d'r in mét e lidje oeëver echte Wieërter vlaaj. Beej de Tanzgarde ‘Vegder Diddeldöpcher St. Vith’ vloêge neet alleîn de beinkes doeër de locht, meer ouch de vröllie, di-j d'r beej huuërdje. Thorsten von Lippe Biesterfeld wist wi-j altiêd de enthousiaste aanwieëzige aan 't zînge te kriêge en aafsloêter Marjolein Heijltjes kriêg neet alleîn 't pebliek, mer ouch de Rogstaekers aan 't dânse.
Wichterfieëstmiddig
Waat waas det weer e fieëst op dae Wichtermiddig. Ongedwoonge lavieërdje di-j klein tösse di-j groeëte minse en edereîn pakdje zich ónger d'n êrm. Clown Desalles blaozje zich de longe uut zien liêf, mer krieëg volop waardieëring van de jeugd vör zien balloncreaties. D'r woeërte polonaises geloupe, gedânsj oppe meziek van Moerepetazie en volop mejgepômptj beej det hilarische nummer van Deindânger. De Huppelpupkes mogte eur verdeêndj applaus in ontvangst neme en diverse aanwieëzige eur al aeve verdeêndje medalie. En tössedoeër krieëg de Optochtkemissie eur wisselpriêze vör de Wichteroptocht trök.
Fieëst vanne Good Gemötszje
Mét of sónger möts: edereîn waas good gemötsj op 't Fieëst vanne Good Gemötszje, zaoterdig 7 fibberwarie 2026 in 't Franciscushoês. De winnaars vanne Knouwelpriês (Duo Vae Dre-j en Driek) en de Gouwe Rog (VV de Hêldje op Zök) woeërte nog 's in 't zönke gezatte en krieêge eure herinneringspriês. Ouch krieêge mieërdere minse e bliêk van waardieëring van de Rogstaekers in de vorm van 'n medalie. Mer boeëvenâl woeërt d'r volop mejgezoonge en gedânsj oppe meziek van artieste as De Köpkes, Nick van Ham, Pruuf Mar, Moerepetazie en Van Lieshout & Arts. En neteurlik blaozje diverse kapèlle d'r lóstig op los. Fieëst!
Vastelaovendj Matinee
De Vastelaovendj Matinee, dae de aafsloêting vormdje van 't Rogstaekers Fieëstweekend in 't Franciscushoês, waas 'n editie di-j joonk en aod bee-jein bracht. En det waas, zjuust as beej de Wichterfieëstmiddig, de ideale mix van aanwieëzige: vör eder wat wils. De Huppelpupkes goeszje weer mét de beinkes of det 't niks waas. En ouch de meziek en lidjes van Stefan Wolter, Mark & Wilhelmien en Thei & Mary ginge d'r in wi-j de bekindje gesnieëje kook. Zjuust (mer dan letterlik) wi-j de vlaaj en de royaal aangeboeëje snacks. Terecht waas d'r applaus, toen Vorst Jasper Medicura bedânkdje vör de sponsoring van dieëze middig en Theo Houben vör 't aanbeeje van de vlaai.
